Na Ally Mohammed, OMPR
WATENDAJI wakuu wa taasisi za Serikali Pemba wametakiwa kusimamia vyema ukusanyaji wa mapato na matumizi mazuri ya fedha za Serikali.
Makamu wa Pili wa Rais wa Zanzibar, Hemed Suleiman Abdulla ametoa agizo hilo katika kikao kazi kilichowakutanisha wakuu wa mikoa, wilaya, maafisa wadhamini makatibu tawala na viongozi wengine wa serikali ya mapinduzi kilichofanyika katika ukumbi wa mikutano wa kiwanda cha Makonyo Wawi chake chake Pemba.
Alisema, viongozi hao ndio watendaji wakuu wa Serikali kwa Kisiwa cha Pemba, hivyo ni vyema kusimamia ipasavyo ukusanywaji na matumizi ya fedha za serikali kwa maslahi ya taifa.
Aidha, Makamu wa Pili amewataka watendaji wao kuacha muhali kwenye ukusanyaji wa mapato, kwani Serikali inahitaji fedha kwa ajili ya utekelezaji wa miradi ya maendeleo.
Hemed amewataka watendaji hao kila mmoja kwenye maeneo yake kutoa elimu juu ya utumiaji wa mashine za elektroniki katika ukusanyaji wa mapato ya serikali ili kuongezeka kwa pato la taifa.
Sambamba na hayo makamu wa pili wa rais amewataka wakurugenzi halmashauri na manispaa kubadilika kwenye usimamizi wa miradi.
Akigusia suala la nidhamu kwa viongozi na wafanyakazi Makamu wa Pili wa Rais alisema, ni vyema viongozi kuwasimamia watendaji walio chini yao ili kuleta ufanisi mzuri wa kazi,
“Kuna watu hawaji kazini, kuna watu wanaondoka bila muda kufika, hawawajibiki vizuri kazini na wengine wanatumia majina ya viongozi kujinufaisha wao wenyewe viongozi chukueni hatua,” alisema.
Sambamba na hayo Makamu wa Pili wa Rais amewaagiza maafisa utumishi kukaa na watendaji wao pamoja na kuwapa elimu ili kujua haki na wajibu wao kwa mujibu wa sheria ya utumishi wa umma namba 2 ya mwaka 2011 na kanuni zake ya mwaka 2014.
“Fuateni utaratibu na sheria za utumishi zinavyosema kwa watendaji walio chini yenu, asionewe mtu, asidhulumiwe mtu, lakini chukueni hatua kisheria,” alisema.
Akizungumza kwa niaba ya viongozi na watengaji wakuu wa taasisi wanofanyia kazi Pemba Mkuu wa Mkoa wa Kusini Pemba, Matar Zahor Masoud amemuahidi Makamu wa Pili wa Rais wa Zanzibar kuyasimamia yele yote ambayo amewaagiza kwa maslahi ya Taifa.
Matar amewataka viongozi wenzake kuacha matabaka katika utendaji wa kazi na kuongeza ushirikiano baina yao ili kuleta ufanisi mzuri katika kazi za kuwahudumia wananchi wa Zanzibar na watanzania kwa ujumla.
